Átta ferðamenn í bílveltum í gær

Átta erlendir ferðamenn komust i hann krappann í þremur bílveltum í gær. Fjórir sænskir ferðamenn voru í bílaleigubíl sem valt á Kjalvegi, skammt frá Gullfossi. Einn þeirra skrámaðist eitthvað en sjúkraflutningamenn gerðu að meiðslum hans á staðnum.

Spænsk hjón sluppu hinsvegar ómeidd þegar bílaleigubíll þeirra valt skammt frá Egilsstöðum í gær. Þar var nýbúið að leggja laust slitlag á veginn og missti ökumaðurinn stjórn á bílnum í lausamölinni.

Sömu sögu er að segja af ökumanni þriðja bílaleigubílsins, sem valt á sama vegarkafla við Egilsstaði, rétt á eftir hinum. Bresk hjón í honum sluppu ómeidd og mun lögregla þá hafa óskað eftir því við Vegagerðina að lausamölinni yrði sópað af veginum.