Dregur úr spítalasýkingum

Björn Zoëga, forstjóri Landspítalans, segir að innlagnarsjúklingum hafi fækkað allmikið að meðaltali hjá spítalnum og verulegur árangur hafi náðst í baráttu við að koma í veg fyrir spítalasýkingar. Þetta er meðal þess sem fram kemur í pistli Björns á heimasíðu Landspítalans þar sem hann fjallar um svokallað skorkort fyrir spítalann í heild sinni með rekstrartölum fyrir fyrstu sex mánuði ársins.

„Kortið staðfestir að við erum á réttri leið hvað flest markmiðin varðar," segir Björn. Árið 2009 fengu að jafnaði tæplega 10% sjúklinga spítalasýkingu en það sem af er árs er hlutfallið 7,5%.

Spítalasýking er sýking sem er til komin eftir innlögn á sjúkrahús. Líkur á slíkri sýkingu er um 10% hjá hverjum sjúklingi. Algengar spítalasýkingar eru: Þvagfærasýkingar, skurðsárasýkingar, lungnabólga, blóðsýkingar og iðrasýkingar. Alvarlegustu sýkingar koma upp á gjörgæsludeildum.