Kristján Loftsson: Fréttaflutningur af útflutningi „njósnastarfsemi“

Um ellefu hundruð tonn af hvalaafurðum sem Hvalur hf. hefur veitt eru í frystigeymslu, en það er tæpur fjórðungur af því sem fyrirtækið veiddi í heild sinni á síðasta ári. Kristján Loftsson segir útilokað að losa þúsund tonn á Japansmarkað á einu bretti og því sé þetta í frystigeymslu.

Fréttablaðið greinir frá því í dag að 372 tonn af af kjöti og rengi af þeim 125 langreyðum sem Hvalur hf. veiddi á síðasta ári hafi verið send á Japansmarkaði á þessu ári, samkvæmt útfllutningstölum Hagstofu Íslands.

125 dýr skila um 1500 tonnum af hvalaafurðum, þ.e kjöti og rengi. Samkvæmt útflutningstölunum hefur því rétt tæplega fjórðungur verið seldur úr landi. Árni Finnsson, er formaður Náttúruverndarsamtaka Íslands, en hann segir að þetta kjöt hafi ekki skilað sér til Japans.

„Samkvæmt nýjustu tölum frá Japan hefur ekkert af þessu kjöti verið flutt inn ennþá. Það getur verið að það sé í tolli í Japan, ég veit það ekki, en það hefur ekki verið flutt inn," segir Árni. Hann segir að 1.100 tonn séu í frystigeymslum hér á landi. Fjórðungur aflans í fyrra og áttatíu tonn á árinu 2008 hafi verið flutt út fyrir samtals átta hundruð milljónir króna.

„Einar K. Guðfinnsson, sem var sjávarútvegsráðherra, veitti leyfi til hvalveiða í janúar 2009 og fullyrti við það tilefni að gjaldeyristekjurnar yrðu fimm milljarðar króna á ári, en við erum svolítið langt frá því," segir Árni. Hann segir að japanski markaðurinn sé mjög tregur og það útskýri sennilega hvers vegna ekkert hafi verið skráð innflutt þar enn, þótt útflutningsskýrslur hér á landi sýni 372 tonn.

Kristján Loftsson, framkvæmdastjóri og stjórnarformaður Hvals, gaf ekki færi á viðtali í morgun en staðfesti í samtali við fréttastofu að í frystigeymslum hér á landi væru 1.100 hundruð tonn af hvalaafurðum en að 372 tonn hefðu verið send til Japans. Hann sagði að afurðirnar væru sendar úr landi hægt og bítandi. Hann sagði að það væri ekki hægt að senda ellefu hundruð tonn á einu bretti til Japans, því það ynni enginn þannig. Hann kallaði fréttaflutning af þessum útflutningi „njósnastarfsemi" og sagði að menn í atvinnulífinu þyrftu að fá frið til að vinna.