Ari nýr framkvæmdastjóri Þjóðleikhússins

„Þetta leggst bara mjög vel í mig, þetta er mjög spennandi starf og mikil örgrun," segir Ari Matthíasson nýr framkvæmdastjóri Þjóðleikhússins. Starfið var auglýst til umsóknar í lok maímánaðar og rann umsóknarfrestur út þann 14. júní síðastliðinn. Tuttugu og fimm umsóknir bárust og mun Ari hefjast störf þegar leikhúsið tekur aftur til starfa að loknu sumarleyfi.

Hann segir í samtali við Vísi að starfið sé mikil ögrun því núna séu erfiðir tímar í rekstri hjá fyrirtækjum og ríkisfyrirtækjum. „Ég held að það séu miklir möguleikar í stöðunni. Ég mun skoða reksturinn og fara yfir hann og sjá hvar er hægt að gera betur," segir Ari.

Ari er menntaður leikari, með BFA gráðu í leiklist frá Leiklistarskóla Íslands, MBA gráðu í stjórnun og rekstri frá Háskólanum í Reykjavík og M.Sc gráðu í hagfræði frá Háskóla Íslands.

Ari starfaði sem leikari í fjölda ára og tók meðal annars þátt í um 40 uppfærslum í atvinnuleikhúsum, mest með Leikfélagi Reykjavíkur, þar sem hann var fastráðinn í 10 ár. Hann hefur leikið í kvikmyndum og sjónvarpi og unnið sem leikstjóri, auk þess að hafa staðið að framleiðslu sýninga og leikhúsrekstri. Utan leikhússins hefur Ari einnig fjölbreytta starfsreynslu, en hann hefur starfað sem framkvæmdastjóri með ábyrgð á rekstri og áætlanagerð, unnið að stefnumótun og markaðsráðgjöf, komið að verkefnastjórnun ýmissa fyrirtækja og stofnana, auk þess að hafa reynslu af opinberri stjórnsýslu. Ari hefur einnig starfað sem stundakennari við Háskólann í Reykjavík.

Ari hefur þannig bæði fjölbreytta menntun og víðtæka reynslu sem ætti að nýtast honum vel í starfi sem framkvæmdastjóri Þjóðleikhússins.

Í tilkynningu frá Þjóðleikhúsinu segir. „Við í Þjóðleikhúsinu hlökkum til samstarfsins við Ara um leið og við þökkum Tómasi Zoega, fráfarandi rekstrarstjóra frábært samstarf undanfarin ár."