Hverfisgatan hreinsuð í dag

Verið er að vinna að því að þrífa græna litinn af Hverfisgötunni í dag. Liturinn var settur á götuna til að afmarka hjólreiðastíg á götunni.

Hans Heiðar Tryggvason, arkitekt og verkefnisstjóri yfir hjólreiðastígaverkefninu, segir að hugsunin með tilrauninni hafi verið að prófa ólíkar lausnir og fá vísbendingar um það hvernig hægt væri að haga hjólreiðastígum til frambúðar. Hann segir að ökumenn hafi ekki virt nægilega bann við að leggja á hjólreiðastígnum. Það sé þekkt dæmi úr borgum þar sem mikil hefð er fyrir einkabílum, til dæmis í New York. „Það tekur bara tíma að breyta viðhorfi," segir Hans í samtali við Vísi.

Hans segir að verið sé að þróa verkefnið áfram og vinna úr upplýsingum. Tilrauninni á Hverfisgötu sé þó lokið.