Bjarni: Ríkisstjórnin gefur enga von

„Á Íslandi starfar ríkisstjórn sem gefur enga von," sagði Bjarni Benediktsson, formaður Sjálfstæðisflokksins, í umræðum um stefnuræðu Jóhönnu Sigurðardóttur, forsætisráðherra, á Alþingi í kvöld. Hann sagði ræðu Jóhönnu ekki vera í takt við veruleikann.

„Þessari ríkisstjórn er beinlínis illa við þær hugmyndir sem ekki hafa orðið til á borði hennar." Þá sagði hann: „Lausnir ríkisstjórnarinnar eru ekkert annað þunglamalegar kerfislausnir."

Bjarni sagði vinstriflokkana aldrei hafa skilið að hlutverk stjórnmálamanna væri að haga lögum og reglum með hliðsjón af því hvernig fólk væri og hverjar þarfir þess væru. „Ekki með hliðsjón af því hvernig við viljum að fólk sé. Það eru þannig lausnir sem ríkisstjórnin hefur boðið upp á. Þess vegna kemur forsætisráðherra hingað og segir fólki hvert það á að fara. Fólk þarf að laga sig að kerfum ríkisstjórnarinnar."

Bjarni sagði að tími ríkisstjórnarinnar væri liðinn.