Innbrot á Geysi enn í rannsókn - verðmæti þýfis fimm milljónir

Þjófanna sem brutust inn í ferðamannaverslunina á Geysissvæðinu er enn leitað. Rannsókn lögreglu hefur enn ekki leitt til niðurstöðu og biður lögregla alla sem veitt geta upplýsingar um málið að hafa samband í síma 480 1010. Söluvirði þess sem stolið var er á fimmtu milljón króna, að því er fram kemur í tilkynningu.

Talsverður erill var hjá lögreglumönnum á Selfossi um helgina. Mörg útköll voru vegna hávaða- og drykkjuláta í húsum og á götum úti. Tilkynnt var um tvær minni háttar líkamsárásir. Önnur í Hveragerði og hin á Selfossi.

Lögreglumenn sem kallaðir voru í fjölbýlishús á Selfossi fundu áberandi hasslykt berast frá einni íbúðinni. Þar fannst hass og var íbúi handtekinn. Hann viðurkenndi að eiga efnin. Fjórir ökumenn voru kærðir fyrir ölvunarakstur um helgina og 19 fyrir hraðakstur.

Bifreið var stolið í Hveragerði aðfaranótt laugardags. Lögreglumenn á Suðurnesjum sá til ferða hennar við Voga á laugardag. Karlmaður, sem ók bifreiðinni, reyndist ölvaður og var hann handtekinn og færður til yfirheyrslu. Hann bar því við að hafa tekið að sér að ferja bifreiðina á milli staða fyrir vinkonu sína. Bifreiðin reyndist óskemmd og var komið til eiganda.

Snemma á föstudag var maður handtekinn á Selfossi grunaður um að hafa tekið bensín hjá Olís á Selfossi án þess að greiða fyrir það. Maðurinn var á bifreið sem stolið var nokkru áður í Reykjavík. Við yfirheyrslur játaði maðurinn bensínstuldin en ekki nytjastuldin en gekkst þó við því að vita að bifreiðin var stolin. Maðurinn hefur oft komið við sögu lögreglu vegna ýmiss konar þjófnaðarmála.