Jóhanna: Stendur ekki á mér að víkja

„Það hefur að sjálfsögðu ekki farið framhjá mér að ýmsir þingmenn kalla nú eftir kosningum. Muni nýtt þing, ný ríkisstjórn og tafarlausar kosningar auðvelda úrlausn þeirra viðamiklu verkefna sem framundan eru, þá mun ekki standa á mér að víkja til hliðar," sagði Jóhanna Siguðardóttur, forsætisráðherra, í stefnuræðu sinni á Alþingi í kvöld. „Ég og ríkisstjórn mín munum hins vegar ekki skorast undan því að ljúka þeim verkefnum sem við blasa, sé það vilji þingsins."

Á sama tíma og Jóhanna flutti ræði sína heyrðist vel í mannfjöldanum á Austurvelli þar sem bumbur voru barðar.

Jóhanna sagði ríkisstjórn Samfylkingarinnar og Vinstri grænna hafa tekið við stjórnartaumunum eftir eitthvert alvarlegasta efnahagshrun síðari tíma. Samt sem áður hafi á ríkisstjórninni tekist á skömmum tíma að ná tökum á efnahagsvandanum og nú horfi fram á betri tíð. „Erlendir sérfræðingar tala jafnvel um kraftaverk í þessu samhengi."

Fjölmiðlar ala á sundrungu



Hún sagði umhugsunarvert hve fjölmiðlar hér á landi hafi dregið upp dökka mynd af ástandinu og fjallað lítið um þann mikla árangur sem náðst hafi. Þá sagði hún fjölmiðla ala á óánægju og sundrungu.

Jóhanna sagði ríkisstjórnina hafa lokið eða komið í farveg meirihluta þeirra mála sem kveðið er á um í samstarfsyfirlýsingu stjórnarinnar. „Við höfum komið fjölmörgum framfaramálum í framkvæmd og við höfum ekki látið staðar numið á þeirri vegferð eins og ný 216 mála þingmálaskrá ríkisstjórnarinnar fyrir komandi þing er meðal annars til vitnis um," sagði Jóhanna og bætti við að grunnur hefði verið lagður að mestu uppstokkun í stjórnkerfi og stjórnsýslu hins opinbera á lýðveldistímanum.

Bankarnir hafa dregið lappirnar



Jóhanna sagði mörg heimili hafa nú þegar fengið skjól eða úrlausn sinna mála með greiðsluaðlögun. „Ég verð að segja í hreinskilni að hinir nýju bankar hafa valdið mér vonbrigðum þegar kemur að skuldaaðlögun fólks og fyrirtækja. Samið var við fjármálastofnanir um að þær kæmu til móts við viðskiptavini sína með sértækri skuldaaðlögun á grundvelli laga."

Þá sagði Jóhanna: „Bankarnir hafa dregið lappirnar þegar kemur að því að leysa úr stöðu einstaklinga sem eru að komast í þrot. Við þetta verður einfaldlega ekki unað og stjórnvöld hljóta að fara fram á skýringar og úrbætur. Það gengur ekki að eigur fólks séu settar á uppboð fyrr en allar aðrar leiðir hafa verið fullreyndar. Í einhverjum tilvikum er sú leið hinsvegar óhjákvæmileg og þá verðum við að geta treyst á leigumarkaðinn og félagslegar húsnæðislausnir."