Styður ekki frumvarp ríkisstjórnarinnar

Jón Bjarnason, sjávarútvegs- og landbúnaðarráðherra, ætlar ekki að styðja frumvarp forsætisráðherra um fækkun ráðuneyta úr tólf í níu. Frumvarpið var lagt fram á Alþingi í gær. Tveir aðrir þingmenn Vinstri grænna hafa einnig lýst yfir andstöðu við frumvarpið.

Í frumvarpi forsætisráðherra er gert ráð fyrir því að iðnaðarráðuneytið og sjávarútvegs- og landbúnaðarráðuneytið sameinist í eitt atvinnuvega- og nýsköpunarráðuneyti. Heilbrigðisráðuneytið og félagsmálaráðuneytið sameinast í velferðarráðuneyti og þá verður til nýtt innanríkisráðuneyti við sameiningu dómsmálaráðuneytis og samgönguráðuneytis. Gert er ráð fyrir því að breytingarnar spari um 360 milljónir króna á ári.

Þverpólitísk nefnd mun fjalla um frumvarpið í sumar en ekki þykir líklegt að frumvarpið verði orðið að lögum fyrr en í haust.

Jón er ósáttur við frumvarpið. „Ég hef lagst gegn því að sjávarútvegs- og landbúnaðarráðuneytið verði lagt niður og hef talið það óskynsamlegt og hið mesta óráð. Það hvílir mikið á þessum atvinnugreinum núna og ímynd þeirra meðal þjóðarinnar skiptir miklu máli. Evrópusambandsumsóknin hvílir líka mjög á þessu ráðuneyti og sú umsókn er mörgum mjög þung í skauti. Ef menn ætla að leggja niður landbúnaðar- og sjávarútvegsráðuneytið í miðju ESB-ferli þá hef ég sagt að það gangi ekki," segir Jón.

Tveir aðrir þingmenn vinstri grænna greiddu atkvæði gegn frumvarpinu þegar þingflokkurinn tók afstöðu til málsins.

Jón Bjarnason segir að frumvarpið sé illa unnið. Gagnrýnin snúist ekki um hans persónu. „Nei, alls ekki. Ég er fyrst og fremst að hlusta á þau rök sem koma fram frá fjölda samtaka í þessum atvinnugreinum. Frá grasrótinni í flokkunum. Við höfum ýmislegt annað að gera en að setja þetta í uppnám,"