Fótspor þúsunda kvenna til sýnis

Síðar í dag verður opnuð myndlistarsýningin „Spor þúsunda kvenna" í göngugötunni á Garðatorgi. Hluti verksins, sem skapað var í Kvennahlaupinu 2009, hefur verið bútaður niður í litlar myndir sem verða til sýnis og sölu í júní, en allur ágóði rennur óskiptur til Krabbameinsfélags Íslands. Hinn hluti verksins hefur verið keyptur af Garðabæ og mun forstjóri Krabbameinsfélagsins, Ragnheiður Haraldsdóttir, afhenda bænum verkið í dag.

Fjölmennasti listgjörningur sem gerður hefur verið á Íslandi

Í Kvennahlaupinu 2009, sem haldið var í samstarfi við Krabbameinsfélag Íslands, tóku þúsundir kvenna þátt í sköpun á listaverki er þær hlupu yfir renning við startlínu hlaupsins og mótuðu þannig með sporum sínum glæsilegt listaverk sem skiptist í tvo 10x2 metra striga sem endurspegla hvorn annan. Listgjörningurinn var framinn af sautján listakonum frá Garðabæ og Álftanesi sem í kjölfarið hafa stofnað samtökin Grósku.

„Í maí 2009 fóru skipuleggjendur Kvennahlaupsins hjá ÍSÍ þess á leit við okkur að gera listaverk eða gjörning í tengslum við Kvennahlaupið í Garðabæ í tilefni af því að hlaupið var haldið í 20. sinn," segir Hrafnhildur Inga Sigurðardóttir, sem bæði tók þátt í framkvæmd verksins og átti upphaflegu hugmyndina.

„Við vildum búa til listaverk sem sýnir hina miklu þátttöku kvenna í hlaupinu og þá samstöðu sem hún endurspeglar, og vildum því að hver þessara kvenna legði sitt af mörkum. Þær reyndust svo vera um 5.500 og því fjölmennasti gjörningur sem gerður hefur verið á Íslandi, að okkar viti!"

Garðabær kaupir listaverk

Sem fyrr segir hefur annar striginn nú verið bútaður niður í litlar myndir: 40x40 cm og 45x45 cm og verða þær til sýnis og sölu á Garðatorgi 10.-20. júní. Allur ágóði af sölu verkanna rennur til Krabbameinsfélags Íslandsins. Hinn striginn hefur verið keyptur af Garðabæ, en forstjóri Krabbameinsfélagsins, Ragnheiður Haraldsdóttir, mun afhenda hann við opnun sýningarinnar.

„Samstöðumáttur kvenna er gríðarsterkt afl. Við vonum að þær konur sem áttu þátt í gerð listaverksins fjárfesti í hluta þess og minnist þannig þátttöku í einhverjum stærsta listgjörningi sem við höfum séð hér á landi," segir Ragnheiður Haraldsdóttir, forstjóri Krabbameinsfélags Íslands. „Okkur þykir afar vænt um þann stuðning sem okkur er sýndur með þessum viðburði og hvetjum konur áfram til að sinna bæði eigin heilsu og að mæta reglulega í skoðun."