Spellvirkin hefðu getað rofið tengslin við umheiminn

Fjarskipti við umheiminn hefðu getað lamast að miklu leyti ef búnaður skemmdarvarga hefði virkað að fullu, þegar þeir reyndu að vinna skemmdarverk á fjarskiptamöstrum í grennd við Veðurstofuna við Búsataðaveg í nótt. Lögregla lítur málið mjög alvarlegum augum, því svona spellvirki þykja ganga hryðjuverkum næst.

Tilkynning barst upp úr klukkan fjögur í nótt um að eldur logaði við möstrin og voru lögregla og slökkvilið kölluð á staðinn. Eldurinn var útdauður þegar slökkviliðið kom, en hann hafði náð að svíða öfluga rafmagnskapla, sem koma upp úr jörðinni við möstrin og liggja upp í þau til að knýja sendibúnaðinn í þeim.

Á vettvangi fundust meðal annars 2 flöskur með með einhverskonar eldfimu efni og sprengibúnaði, sem ekki hefur virkað, þannig að tjónið varð mun minna en spellvirkjarnir hafa stefnt að. Þó féllu niður örbylgjusendingar sjónvarpsstöðva en tæknimönnum tókst að koma þeim á aftur á áttunda tímanum í morgun.

Möstrin bera meðal annas loftnet Tetra, Vodafone, Símans, Landsvirkjunar og Mílu. Lögregla leggur áherslu á rannsókn málsins, en enginn hefur lýst verknaðinum á hendur sér, engin hótun eða tilkynning hefur borist í tengslum við þetta og engin sérstakur liggur enn undir grun, samkvæmt heimildum fréttastofu.