Michael Madsen er rödd Egils Skallagrímssonar

Hollywood-leikarinn Michael Madsen talar fyrir Egil Skallagrímsson í nýrri teiknimynd sem íslenska fyrirtækið Caoz framleiðir í samstarfi við ungverska kvikmyndagerðarmenn.

Arnar Þórisson hjá Caoz segir að aðkoma þeirra að myndinni sé að sjá um tónlistina og þá komu þeir einnig að handritsgerðinni.

„Ég kynntist leikstjóranum Aroni Gauder á ráðstefnu fyrir nokkrum árum. Og þegar hann hafði samband við mig um gerð þessarar myndar og vildi athuga hvort við værum spenntir fyrir samstarfi þá gátum við ekki sagt nei; það er ekki hægt að gera mynd um Egil án þess að Íslendingar komi þar nærri," segir Arnar en aðstandendur myndarinnar hafa komið nokkrum sinnum til Íslands, verið á söguslóðum Egils í Borgarfirði og lesið Egilssögu fram og til baka. Aron þessi sló eftirminnilega í gegn með fyrstu teiknimyndinni sinni Nyócker! fyrir sex árum og var strax harðákveðinn í því að láta Egilssögu verða sitt næsta verkefni. Arnar lýsir myndinni sem fullorðinslegri teiknimynd enda vart annað hægt; saga Egils er nokkuð blóði drifin, svo vægt sé til orða tekið.

Búið er að taka upp leikrödd Madsen og Arnar segir það hafa komið sér á óvart hversu vel leikarinn náði að túlka íslenska víkinginn. „Hann bað mig reyndar um að fara með Höfuðlausn á íslensku fyrir sig, svona til að fá „fílinginn" fyrir því hvernig það hljómaði á íslensku," útskýrir Arnar en bætir við að enn eigi eftir að fullklára fjármögnun myndarinnar. Hann er þó bjartsýnn á að það eigi eftir að ganga eftir.

Madsen ætti að vera kvikmyndaáhugamönnum að góðu kunnur. Hann lék Mr. Blonde í hinni stórgóðu kvikmynd Quentins Tarantino, Resevoir Dogs, og þá birtist hann Íslendingum í Kill Bill 2 með íslenskt brennivín upp á arminn.

Madsen er þekktur fyrir að leika hálfgerða hrotta á hvíta tjaldinu en færri vita eflaust að hann er liðtækur ljósmyndari og þykir ansi lunkið ljóðskáld. Hann hefur fengið ljóðabækur sínar útgefnar um allan heim, rétt eins og Egill.

freyrgigja@frettabladid.is