Samkynhneigðir stúdentar fagna ellefu ára afmæli

Í dag, 19. janúar, fagnar Q - félag hinsegin stúdenta 11 ára afmæli félagsins. Að því tilefni verður aðalbygging Háskóla Íslands lýst upp í regnbogalitum samkvæmt tilkynningu frá samtökunum, til að fagna deginum og þeim margbreytileika sem finna má meðal nemenda, kennara og starfsfólks innan Háskóla Íslands.

Q eru hagsmunasamtök innan Háskóla Íslands sem beita sér fyrir réttindum hinsegin stúdenta. Q er ætlað að vera sýnilegt afl innan háskólans, stuðla að fræðslu og vera málsvari hinsegin stúdenta þegar málefni þeirra ber á góma. Tilgangur félagsins er einnig að gefa hinsegin nemendum stuðning og sýna þeim samheldni.

Hinsegin eru þeir sem skynja kynhneigð sína, kyn eða kyngervi öðruvísi en það sem samfélagið segir að sé eðlilegt.

Q býður öllum að fagna afmælinu í regnbogasal samtakanna '78 næsta föstudag og mun fagnaðurinn byrja klukkan 20:00.