Kosningin í samræmi við reglur

„Niðurstaðan er sú að þessi kosning hafi verið í samræmi við reglur. Úrslitin standa því óbreytt," segir Stefán Pálsson, formaður kjörnefndar VG í Reykjavík. Þorleifur Gunnlaugsson, borgarfulltrúi og frambjóðandi í prófkjöri VG fyrir sveitastjórnarkosningarnar kærði utankjörfundarkosningu prófkjörsins. Í samtali við Vísi sagðist hann hafa vitneskju um það að ákveðnir frambjóðendur hefðu látið keyra atkvæðaseðla heim til kjósenda.

Stefán segist gera ráð fyrir að í einhverjum tilvikum hafi þetta verið eins og Þorleifur lýsir því. „Reglurnar heimila það enda eru þær til að mynda hugsaðar ef um er að ræða veikt fólk sem á ekki heimangengt. Þá er nokkuð ljóst að það gæti þurft að keyra til þess kjörseðla og sækja," segir Stefán.

Stefán segir að prófkjörsreglurnar séu þær sömu og voru í forvölunum hjá VG 2007 og 2009. Þær hafi ekki valdið ágreiningi þá. „Sem er ekki af því að menn hafi verið að haga sér eitthvað öðruvísi þá en núna, heldur kannski frekar vegna þess að það er mjótt á munum núna," segir Stefán.

Stefán segir að persónulega hefði hann viljað sjá betri og skýrari reglur um póstkosningu. Hins vegar verði kjörnefnd að fara eftir þeim reglum sem VG í Reykjavík samþykki á félagsfundi. Hann eigi samt ekki von á því að kosið verði eftir þessum prófkjörsreglum aftur.

Eins og fram hefur komið á Vísi í dag höfðu utankjörfundaratkvæðin ekki áhrif á röð sex efstu manna. Röð þeirra hefði því verið óbreytt þótt atkvæðin hefðu verið úrskurðuð ógild.