Hera Björk: Allir eiga eftir að hafa skoðun á kjólnum

„Í dag ætlum við að hvíla okkur í faðmi fjölskyldu og vina en svo förum við á fullt að vinna í því að vinna þessa keppni í Osló," segir Hera Björk Þórhallsdóttir sem sigraði Söngvakeppni Sjónvarpsins um helgina með lagið Je ne sais quoi þegar Vísir spyr hana út í framhaldið.

„Það er í mörg horn að líta en við erum með svo dásamlegt fólk með okkur þannig að þetta verður bara gaman."

„Við ætlum að skoða jafnvel einhverjar breytingar á laginu og reyna að koma þessu í góðan keppnisbúning fyrir Osló."

„Svo er búið að bjóða okkur til Hollands og Englands í Eurovision upphitunarpartí þannig að það er aldrei að vita nema við kíkjum eitthvað á þessa Icesave samninga og reynum að greiða úr þeim málum svona í leiðinni."

Í hverju ætlar þú að vera á sviðinu í Osló? „Það er ekki á hverjum degi sem maður stendur á svona sviði þannig að þetta verður eitthvað svakalegt dress sem allir eiga eftir að hafa skoðun á og mun verða skráð á spjöld sögunnar ásamt svanakjólnum hennar Bjarkar," svarar Hera hlæjandi.

„Ég elska íslenska hönnuði og þar eru hún Birta í JUNIFORM, Íris í LIBER , Kolbrún í KOW og Spaksmanns í mesta uppáhaldinu. Ég veit bara það, að það sem ég verð í verður eitthvað sem mér á eftir að líða vel í og það er það sem skiptir mestu."

Hver sér um hárið og förðunina? „Það eru þær Elín Reynis sminka og Emilía Tómasdóttir hjá EMÓRA í Árbænum sem sjá um okkur í Osló."

„Þær eru báðar góðar vinkonur mínar, yndislegar stelpur sem kunna sitt fag, eru jákvæðar, með góðan húmor og ástríðu fyrir sínu fagi."

„Ég þekki fullt að yndilsegu fagfólki hverju öðru betra en þessar tvær eiga smá í mér, þekkja mig vel og ég treysti þeim."-elly@365.is

Hera Björk í fréttum Stöðvar 2 í gær.