Átak gegn atvinnuleysisvánni

Vinnumálastofnun (VMST) hefur fengið fjármagn til að fjölga starfsráðgjöfum um tíu. Sérstakt átak verður gert á næstu mánuðum til að hjálpa þeim sem hafa verið atvinnulausir í langan tíma. Ungt fólk er þar í forgrunni.

Gert er ráð fyrir því að langtíma­atvinnuleysi muni ná til allt að tíu þúsund manns innan fárra mánaða. Á milli desembermánaða 2008 og 2009 þrettánfaldaðist hópurinn sem hafði verið atvinnulaus í meira en ár. Í lok desember 2009 voru þeir 3.224 en voru 255 í sama mánuði 2008.

Hrafnhildur Tómasdóttir, deildarstjóri ráðgjafardeildar VMST, segir langtímaatvinnuleysi sérstakt áhyggjuefni og stofnunin sé um þessar mundir að grípa til sérstaks átaks undir hennar stjórn. Boðinn verður fjöldi úrræða til að stoppa þann vítahring sem fjöldi fólks er kominn í og er horft til fólks á öllum aldri þó að ungt fólk njóti forgangs í byrjun verkefnisins. - shá