Löngu útrunninn samningur

Samningur um nýtingu Ísafjarðarbæjar á vatni úr landareign Hvamms í Dýrafirði kann að hafa runnið út árið 1977. Frá þessu greinir Bæjarins besta á Ísafirði, bb.is.

„Eigendur Hvamms í Dýrafirði hafa óskað eftir fundi með bæjaryfirvöldum í Ísafjarðarbæ varðandi nýtingu á vatni á landar­eigninni," segir í fréttinni, en þar kemur jafnframt fram að í desember hafi verið haldinn samráðsfundur með flestum eigendum Hvamms þar sem farið var yfir nýtingu sveitarfélagsins á vatni úr landi Hvamms.

Komi í ljós að samningurinn hafi ekki verið endurnýjaður vilja landeigendur að hliðsjón verði höfð af sambærilegum samningum um vatnsnýtingu sveitarfélaga í nýjum samningi. - óká