Hver og einn gefið 88 krónur

Hjálparstarf Hver og einn Íslendingur hafði í gær gefið Rauða krossi Íslands 88 krónur til að sinna neyðaraðstoð á Haítí. Alls eru þetta 28 milljónir. Enn er framlag frá deildum RKÍ og framlag íslenska ríkisins ekki komið fram. Því kann svo að fara að heildarframlög verði um eða yfir fimmtíu milljónir.

„Þetta eru frábær viðbrögð," segir Sólveig Ólafsdóttir hjá Rauða krossi Íslands. Söfnunin verði opin fram yfir helgi og líklega lengur því alþjóðlegi Rauði krossinn hefur nú sent út beiðni um neyðaraðstoð til þriggja ára, sem hljóðar upp á 12,5 milljarða króna.

Hjá RKÍ söfnuðust um fimmtíu milljónir í heildina vegna jarðskjálftanna í Pakistan 2005, þar af 23 milljónir frá almenningi. Vegna tsunami-skjálftaflóðbylgnanna í Asíu 2004 söfnuðust hátt í 170 milljónir.

Verði heildarframlag Íslendinga í gegnum Rauða krossinn fimmtíu milljónir reiknast það sem rúmar 157 krónur frá hverjum Íslendingi. Tekið skal fram að fleiri félög safna nú hér á landi í þágu Haítí-búa, svo sem UNICEF. - kóþ