Þjóðfundur í Bolungarvík

Á morgun verður haldinn þjóðfundur í Íþróttahúsinu í Bolungarvík þar sem koma saman fulltrúar íbúa á Vestfjörðum, sem valdir eru með tilviljunarkenndu úrtaki úr þjóðskrá, og fulltrúar hagsmunaaðila af svæðinu. Þar er um að ræða fólk úr sveitarstjórnum, atvinnulífi, launþegasamtökum, stofnunum og stjórnmálaflokkum. 110 hafa skráð sig til þátttöku en 80 manns voru á þjóðfundi á Egilsstöðum síðastliðinn laugardag sem heppnaðist vel. Þetta kemur fram í tilkynningu frá forsætisráðuneytinu.

Verkefnið á þjóðfundum landshlutanna, sem haldnir verða á hverjum laugardegi til 20. mars, er að setja fram hugmyndir um framtíðaráform á viðkomandi svæði til eflingar atvinnulífs og samfélags á grundvelli sérstöðu og styrkleika svæðanna. Þessi vinna verður grundvöllur að áætlun hvers landshluta innan þeirrar sóknaráætlunar sem ríkisstjórnin hefur ákveðið að gerð verði og tillaga til þingsályktunar hefur verið lögð fram um á Alþingi, að fram kemur í tilkynningunni.

Undirbúningur fundarins í Bolungarvík var höndum stýrihóps um sóknaráætlun en framkvæmd hans er á vegum Fjórðungssambands Vestfirðinga og Atvinnuþróunarfélags Vestfjarða.

Þjóðfundurinn í Bolungarvík stendur frá klukkan 10 til 16.