Björgunarsveitir eltast við þakplötur og vinnuskúra

Í dag og í kvöld hafa björgunarsveitir víða verið kallaðar út vegna óveðursins sem gengur yfir landið.

Á Selfossi fauk upp þakgluggi, á Hellu fuku plötur af Hótel Rangá, í Vestmannaeyjum voru nokkur smærri verkefni, m.a. við Hamarsskóla og hið sama er að segja um Grindavík þar sem björgunarsveitin fergði þak sem var að fjúka af íbúðarhúsi og þak fauk af fjárhúsi, bárujárnsstafli fór af stað sem og nokkur skilti í bænum.

Í Keflavík var tilkynnt um að þakið væri að fjúka af Officeraklúbbnum á vallarsvæðinu, vinnuskúr fauk, bátur slitnaði frá bryggju og fleira. Í Garði varð líka vart við fok á lausum munum. Í Skeiða- og Gnúpverjahreppi var björgunarsveitin Sigurgeir kölluð út í kvöld þegar hlaða við bæ í hreppnum fauk.

Töluvert magn af spýtnabraki fór af stað á Patreksfirði og ógnaði þar öryggi vegfarenda og verðmætum og sá björgunarsveit um að fergja það sem ekki var farið af stað og tína saman restina. Á Akranesi glímdi björgunarsveitin við fjúkandi girðingu og fleira smálegt og björgunarsveitir á höfuðborgarsvæðinu og í Mosfellsbæ hafa elst við skjólveggi, klæðningar, vinnuskúra og vinnupalla.