Beinagrind steypireyðarinnar á Skaga bjargað

Umhverfis- og menntamálaráðherra fengu samþykkta tveggja milljóna króna fjárveitingu á ríkisstjórnarfundi í morgun til að bjarga beinagrind steypireyðarinnar sem rak á land á Skaga fyrir norðan á dögunum.

Steypireyður er alfriðuð skepna en hún er talin vera stærsta dýr sem lifað hefur á jörðinni. Þar sem hvalurinn er alfriðaður er ekki hlaupið að því að verða sér út um beinagrind úr honum. En á mánudaginn í síðustu viku fannst hræ af um tuttugu og þriggja metra langri steypireyð við eyðibýlið Ásbúð á Skaga. Umhverfis og menntamálaráðherra hfa nú gripið til ráðstafana svo bjarga megi beinagrind hvalsins.

„Sem er auðvitað merkilegt dýr og stærsta spendýr jarðar. Við erum með tillögu um það hvernig megi varðveita beinagrindina," Katrín Jakobsdóttir, menntamálaráðherra.

„Náttúrufræðistofnun Íslands hefur þegar hafið vinnu við það og mun forða beinunum og setja þau í varðveislu þannig að við getum í fyllingu tímans, vonandi á góðum stað, haft þau til sýnis og fræðslu fyrir almenning. Ég neita því ekki að þetta er með skemmtilegri málefnum sem við höfum haft á borði ríkisstjórnar, það er að segja hvalreka," segir Svandís Svavarsdóttir, umhverfisráðherra.

Gífurlegt magn af kjöti og grút fylgir hræinu sem þarf að losna við og segir umhverfisráðherra að farið verði eftir reglum um förgun slíkrar mengunar. Ríkisstjórnin mun leggja tvær milljónir króna til verksins. „En ég held líka fræðslugildið sé ómetanlegt bæði fyrir íslensk skólabörn og erlenda ferðamenn sem hingað koma," segir Katrín.

Ráðherrarnir segja að ekki liggi fyrir hvar beinagrindinni verði komið fyrir.