Handrukkari og meintur kynþáttahatari úrskurðaður í varðhald

Héraðsdómur Reykjavíkur hefur úrskurðað mann á fertugsaldri í gæsluvarðhald vegna gruns um líflátshótanir í garð kúbverskra feðga og eignaspjöll á heimili þeirra.

Maðurinn var handtekinn í gær ásamt unglingspilti sem sleppt var að loknum yfirheyrslum. Í hádegisfréttum RÚV kom fram að maðurinn væri þekktur handrukkari og hefði áður komið við sögu lögreglu. Þar sagði einnig að fjölskyldufaðirinn, Alberto Borges Moreno, væri þjálfari hjá ÍR og að sonur hans væri afreksíþróttamaður.

Sonurinn hefur átt vingott við íslenska stúlku sem er nemi í Menntaskólanum í Kópavogi. Samband þeirra féll í grýttan jarðveg hjá nokkrum skólafélögum stúlkunnar sem voru andsnúnir drengnum vegna litarháttar hans að því er fram kemur í fréttum RÚV.