Ráðherraskiptin kosta almenning milljónir

Kostnaður vegna biðlauna við ráðherraskiptin nemur á þriðja tug milljóna króna. Ýmislegt er þó enn á huldu við skiptin þar sem ólíklegt þykir að nýir ráðherrar vilji hafa tvo ráðherrabílstjóra.

Réttur ráðherra til biðlauna er annað hvort þrír mánuðir eða sex. Það fer eftir því hvort þeir hafi gengt starfinu í ár eða skemur.

Ragna Árnadóttir, fráfarandi dómsmálaráðherra, og Gylfi Magnússon, fráfarandi efnahags- og viðskiptaráherra, hafa gengt starfinu frá því í febrúar 2009 og hafa því starfað lengur en í ár. Þau eiga því rétt á biðlaunum í sex mánuði en biðlaun eru jafnhá ráðherralaunum.

Laun ráðherra eru 855 þúsund krónur og má því ætla að þau muni samanlagt þiggja rúmlega 10,2 milljónir í biðlaun.

Kristján Möller, fráfarandi samgönguráðherra, hefur gegnt ráðherraembætti frá því í maí 2007 og mun því frá greidd ráðherralaun í sex mánuði eins og Ragna og Gylfi. En þau nema rúmlega 5 milljónum.

Álfheiður Ingadóttir tók við embætti heilbrigðisráðherra í október 2009 og hefur því aðeins rétt til biðlauna ráðherra í þrjá mánuði. Þau nema rúmlega tveimur og hálfri milljón. Þó skal nefna að þau tvö síðarnefndu munu áfram gegna þingmennsku og mun þingfarakaup þeirra því dragast frá þeim kostnaði. Heildarupphæð biðlauna þeirra tveggja nemur því um þremur milljónum.

Samanlagt munu biðlaun þessara fjögurra ráðherra því nema rúmlega 13 milljónum. Þá á eftir að telja laun ýmissa starfsmanna ráðuneytanna sem tapast við sameiningu ráðuneyta.

Þannig missa aðstoðarmenn fyrrverandi ráðherra vinnuna en grunnlaun þeirra eru 659 þúsund krónur. Þeir hafa rétt á biðlaunum í þrjá mánuði. Og því mun kostnaðurinn við biðlaun þeirra nema um átta milljónum.

Þá er ljóst að biðlaun vegna ráðherraskiptana geta numið um það bil 21 milljón. Hins vegar er ýmis kostnaður vegna sameiningar ráðuneytanna enn á huldu. Til að mynda þykir ólíklegt að Guðbjartur Hannesson, sem tekur við félagsmálaráðuneytinu sem og heilbrigðisráðuneytinu, vilji hafa tvo ráðherrabílstjóra.

Sömu sögu er að segja um Ögmund Jónasson, sem hefur tekið við lyklum að ráðuneyti dómsmála og svo lyklum í samgönguráðuneytinu.

Stefnt er að frekari sameiningu ráðuneytanna eftir áramót.