„Birgitta er atvinnustjórnmálamaður og einstæð móðir“

„Birgitta Jónsdóttir er ekki hluti af Wikileaks. Ég hef ekki talað við hana í marga mánuði. Ég talaði við hana fyrst árið 2009. Hún er atvinnustjórnmálamaður og einstæð móðir á Íslandi," sagði Julian Assange, forsrpakki Wikileaks, í viðtali við Fox News um Birgittu Jónsdóttur, þingmann Heyfingarinnar.

Birgitta hefur hvatt Julian til þess að stíga til hliðar á meðan ásakanir um kynferðisofbeldi á hendur honum eru til rannsóknar í Svíþjóð.

Í viðtalinu segir Julian að það komi ekki til greina að hann stígi til hliðar - í það minnsta átakalaust.

Julian hefur verið kærður fyrir að beita tvær konur kynferðisofbeldi. Í fyrstu var gefin út handtökuskipun í hans nafni en hún var svo dregin til baka.

Síðar voru ákærur einnig dregnar til baka. Þær voru svo teknar aftur upp eftir að meintir þolendur kærðu þá ákvörðun.

Málið hefur því einkennst af flumbrugangi og vill Julian sjálfur meina að um ófrægingaherferð sé að ræða. Heimasíðan Wikileaks, hefur lekið um 75 þúsund leyniskjölum á netið um störf bandaríska hersins í Afganistan og Írak.

Svo virðist sem Julian ætli ekki að hlusta á ráð Birgittu um að hann eigi að stíga til hliðar. Birgitta kom að framleiðslu og vinnslu myndbands sem RÚV og Julian gerðu ásamt Kristni Hrafnssyni. Það sýndi þegar bandarískir hermenn bönuðu almennum borgurum í Írak.