Gjaldskrárhækkanir OR kosta borgarsjóð hundruð milljóna

Rekstrarkostnaður Reykjavíkurborgar gæti aukist um hundruð milljóna króna vegna gjaldskrárhækkana Orkuveitu Reykjavíkur, segir Sóley Tómasdóttir, borgarfulltrúi VG.

Sóley lagði, ásamt borgarráðsfulltrúum Sjálfstæðisflokksins, fram fyrirspurn í borgarráði í dag um áætlaðan kostnaðarauka Reykjavíkurborgar vegna hækkana á gjaldskrá Orkuveitunnar. Óskuðu þau eftir því að fá áætlaðan kostnað sundurliðaðan á hvert svið borgarinnar og auk þess hvernig meirihlutinn hyggst mæta þessum kostnaðarauka.

„Ég hef heyrt það áætlað að bara sundlaugarnar í Reykjavík komi til með að þurfa 36 milljónir árlega í viðbót vegna gjaldskrárhækkana Orkuveitunnar," segir Sóley. Hún bendir á að þar með séu allar aðrar stofnanir borgarinnar ótaldar. „Fólk áttar sig kannski ekki á því að við þurfum að bæði kynda og lýsa upp alla grunnskólana, öll listasöfnin, alla leikskólana og öll íþróttahús. Fyrir utan götulýsingu, sem er nú ekkert smáræði," segir Sóley. Það kæmi sér því ekki á óvart að aukinn kostnaður borgarinnar hlypi á hundruðum milljóna. „Þá velti ég fyrir mér hvort meirihlutinn hafi hugsað þetta mál til enda," segir Sóley.

Aðspurð hvort þessar gjaldskrárhækkanir séu ekki bara leikur að tölum fyrir Reykjavíkurborg þar sem að borgin sé langstærsti eigandi OR og borgarsjóður hafi hingað til fengið greiddan arð frá fyrirtækinu segir Sóley að hagsmunir Reykjavíkurborgar sem eiganda og þjónustuþega verði að fara saman. Þá bendir hún á að lagt hafi verið til að borgarsjóður fái ekki greiddan arð frá Orkuveitunni í ár. Ákvörðun um það verði tekin á næsta eigendafundi OR.