Kredia óskar eftir fundi með ráðherra

Framkvæmdastóri Kredia hefur óskað eftir fundi með Árna Páli Árnasyni félagsmálaráðherra til að ræða starfsemi félagsins. Hann er ósáttur við ummæli í fjölmiðlum undanfarið um að smálánastarfsemi félagsins sé okurstarfsemi. Árni Páll lét hafa eftir sér í viðtali við Stöð 2 á dögunum að smálán séu siðlaus sjóræningjastarfsemi og að hann hyggist beita sér fyrir lagasetningu sem komi böndum á slíkt.

Hægt er að fá lán hjá Kredia hvenær sem er sólarhringsins með því að senda sms í tiltekið númer. Leifur A. Haraldsson framkvæmdastjóri Kredia segist hafa kallað eftir regluverki sem tryggi ábyrga smálánastarfsemi og sé sammála ráðherra hvað það varðar.

Fram hefur komið í fjölmiðlum að fjöldi ungmenna hafi steypt sér í miklar skuldir vegna þessara lána. Leifur vill ekki kannast við það.

„Af þeim sem hafa verið að draga greiðslur má rekja um 0,5 prósent til ungs fólks á aldrinum 18-20 ára. En málið er að það stendur í skilum.

Við höfum hingað til ekki sent einn einstakling í lögfræðiinnheimtu, enda ekki verið tilefni til þess", segir hann.

Ekki hefur borist svar frá félagsmálaráðherra vegna beiðni Kredia.