Ætla að selja 50 þúsund slaufur til 15. október

Krabbameinsfélag Íslands ætlar að selja 50 þúsund bleikar slaufur fram til 15. október næstkomandi.

Slaufusalan hefst á morgun en slaufan var afhjúpuð við athöfn í heilbrigðisráðuneytinu í dag þegar Guðbjartur Hannesson heilbrigðisráðherra afhenti fyrstu slaufurnar þremur konum sem allar hafa barist við krabbamein. Þær heita Stefanía Guðmundsdóttir, Ágústa Erna Hilmarsdóttir og Guðný Kristrún Guðjónsdóttir.

Í tilkynningu frá Krabbameinsfélaginu segir að bleika slaufan í ár sé hönnuð af Ragnheiði I. Margeirsdóttur, en hún bar sigur úr býtum í samkeppni um hönnun hennar.