Biðst afsökunar á að hafa flutt inn notuð reiðtygi

Karlmaður sem stöðvaður var í tollinum í fyrradag með notuð reiðtygi segir að um hugsunarleysi hafi verið að ræða. Matvælastofnun og Landssamband hestamanna líta málið grafalvarlegum augum enda hætta á að smitsjúkdómar geti borist hingað til lands með þessum hætti.

Fréttir af málinu slógu samfélag hestamanna hér á landi í gær enda er smitfaraldur sem herjar á íslenska hestinn enn í gangi. Bíll mannsins sem heitir, Valdimar Bergstað, var að koma hingað til lands með gámaflutningaskipi. Í honum fundust notuð reiðtygi og óhreinn fatnaður.

Bíllinn var einnig mjög skítugur og hafði greinilega verið notaður í umhverfi hesta erlendis.

Í fréttum í gær sagði Haraldur Þórarinsson formaður Landssambands hestamanna að eftir því sem hann best vissi ætli Matvælastofnun að skoða málið, yrði það ekki gert myndi Landssambandið leggja fram kæru og fylgja málinu fast eftir.

Málið er ekki síst alvarlegt í ljósi þess að innflutningurinn hefði getað falið í sér mikla hættu á að nýr smitsjúkdómur bærist í íslenska hrossastofninn eða aðrar dýrategundir.

Ekki náðist í Valdimar Bergstað í morgun en í yfirlýsingu sem hann sendi frá sér í gærkvöldi vegna málsins segir hann að honum þyki mjög leitt að hafa orðið á þessi mistök.

Þetta hafi ekki verið gert af ásetningi og hann hafi ekki verið að reyna að smygla neinu til landsins heldur hafi þetta fyrst og fremst verið gert í hugsunarleysi. Um sé að ræða hans eigin reiðtygi sem hann tók með sér og notaði erlendis.

Þá segir Valdimar að honum hafi vitanlega átt að vera ljóst að ekki mætti flytja notuð reiðtygi aftur til landsins og hann geti með engu móti réttlætt þessa yfirsjón. Hann biður síðan alla þá sem málið varðar, innilegrar afsökunar.