Chomsky til Íslands

Bandaríski þjóðfélagsrýnirinn Noam Chomsky er væntanlegur hingað til lands og mun flytja fyrirlestur við Háskóla Íslands í september á næsta ári.

Hann verður heiðursgestur og öndvegisfyrirlesari Hugvísindasviðs í tengslum við 100 ára afmæli Háskólans.

Chomsky er prófessor við MIT háskóla í Bandaríkjunum. Hann er einn áhrifamesti kenningasmiður í sögu málvísindanna. Auk þeirra hefur hann látið þjóðfélagsmál og fjölmiðla sig miklu varða, en eftir hann liggja yfir 80 bækur á því sviði. Hann hefur verið sagður vinstrisinnaður, en segist sjálfur vera anarkisti.

Hann er fæddur árið 1928 og því kominn á níræðisaldur, en er enn í fullu fjöri. Hann flutti fyrirlestur um netið í gær, og svaraði fyrirspurnum á Alþjóðlegu kvikmyndahátíðinni í Háskólabíói í gær, í tengslum við sýningu myndarinnar Manufacturing Consent. Hún byggir á einni af bókum Chomskys, þar sem fjallað er um framgöngu fjölmiðla vestanhafs og þeir meðal annars gagnrýndir fyrir þjónkun við stjórnvöld.