Enginn embættismaður áminntur í áratug

Enginn embættismaður hefur fengið áminningu undanfarinn áratug, að því er fram kemur í svari fjármálaráðherra við fyrirspurn á Alþingi.

Guðlaugur Þór Þórðarson, þingmaður Sjálfstæðisflokksins spurði hversu margir hefðu verið áminntir undanfarin tíu ár og hvaða ástæður hefðu legið þar að baki.

Fram kemur í svarinu að embættismenn undir utanríkis-, fjármála-,iðnaðar-, viðskipta- og umhverfisráðuneyti, hefðu ekki hlotið áminningu á tímabilinu - ekki bárust svör frá öðrum ráðuneytum.

Einn forstöðumaður stofnunar undir iðnaðarráðuneyti hefði fengið bréf um fyrirhugaða áminningu vegna brots á þagnarskyldu, en málinu lauk ekki með áminningu. Til stóð að áminna Steingrím Ara Arason, forstöðumann Sjúkratrygginga, fyrr á árinu en horfið var frá því.