Landsbankinn fær ekki Securitas - tókst ekki að veðsetja félagið rétt

Héraðsdómur Reykjavíkur féllst ekki á það í dag að viðurkenna veðrétt Landsbankans í öryggisfyrirtækinu Securitas sem Fons átti og hafði sannarlega reynt að veðsetja fyrir rétt tæpar 150 milljónir.

Um 99,93 prósent eignarhlut Fons í Securitas var að ræða.

Fons, sem var í eigu Pálma Haraldssonar, ætlaði að veðsetja bréf félagsins í öryggisfyrirtækinu. Aftur á móti var réttra formreglna ekki gætt við veðsetninguna.

Í áliti Landsbankans sagði að það hefði verið augljós ásetningur allra aðila að skapa Landsbankanum fullgilt veð yfir eignarhluta Fons í Securitas. En sökum þess hve stjórn Securitas var nátengd stjórn og stjórnendum Fons á þeim tíma er handveðsyfirlýsingin var undirrituð, hafi Fons látið hjá líða að senda skriflega beiðni aftur til Securitas, þar sem óskað var eftir heimild til veðsetningarinnar.

Sú vanræksla varð til þess að héraðsdómur gat ekki fallist á kröfu Landsbankans.

Svo segir orðrétt í dómnum: „Sóknaraðili er opinber stofnun, sem hefur á að skipa fjölda sérfræðinga sem eiga að gæta þess að formlega sé rétt gengið frá slíkum veðsetningum og verður því að bera hallann af því, hafi ekki verið farið að formreglum við slíkar veðsetningar."