OR endurskoðar ekki bílafríðindi stjórnenda

Orkuveita Reykjavíkur hyggst ekki endurskoða bílafríðindi fjögurra stjórnenda fyrirtækisins en Orkuveitan, sem er að mestu í eigu reykvískra skattgreiðenda, keypti nýlega Mercedes Benz lúxusjeppa handa fjármálastjóranum á sama tíma og boðaðar eru hækkanir á heitu vatni.

Það kom eins og skrattinn úr sauðaleggnum aðeins örfáum dögum eftir kosningar þegar greint var frá því að hugsanlega þyrfti að hækka gjaldskrá Orkuveitu Reykjavíkur til að ná fimm ára markmiðum um arðsemi. Miðað við þessar áætlanir yrði heita sturtan dálítið dýr eftir kreppu því miðað var við að hækka þyrfti verð á heitu vatni um 37 prósent. Meirihluti Sjálfstæðisflokks og Framsóknar andmæltu þessu reyndar og sögðu þörf á hækkun ofmetna.

Á meðan borgarbúar þurfa hugsanlega að sæta því að greiða hærra verð fyrir heita vatnið, eru menn ekkert á sparnaðarbuxunum hjá Orkuveitunni þegar kemur að bílamálum stjórnenda. Því núna í maí síðastliðnum festi fyrirtækið kaup á Mercedes Benz eðalvagni fyrir fjármálastjóra fyrirtækisins.

Jóhann Hauksson, blaðamaður á DV, greindi frá bílakaupunum í blaðinu í dag. Fréttastofa hafði samband við Orkuveituna vegna málsins og samkvæmt upplýsingum þaðan fá fjórir stjórnendur bíl á kostnað fyrirtækisins. Forstjórinn, fjármálastjórinn og tveir framkvæmdastjórar, en um er að ræða tvo Landcruiser jeppa, Nissan Pathfinder og Benz.

Í myndskeiði, hér að ofan, má sjá Mercedes Benz jeppann sem keyptur var handa fjármálastjóranum í maí síðastliðnum en gripurinn kostaði 8 milljónir króna. Hjörleifur Kvaran, forstjóri Orkuveitunnar, gat ekki rætt við fréttastofu í dag vegna anna en að sögn Eiríks Hjálmarssonar, upplýsingafulltrúa, er um að ræða kjör samkvæmt ráðningarsamningi. Kjörnir fulltrúar borgarinnar lýstu í dag furðu sinni með bílakaupin. Eiríkur sagði í samtali við fréttastofu nú síðdegis að ekki hefði verið tekin ákvörðun um að endurskoða bílafríðindi stjórnendanna.