Fráleitt að átta þúsund ríkisstarfsmenn missi vinnuna

Bjarni Benediktsson, formaður Sjálfstæðisflokks, segist hafa heyrt tölur þess efnis að boðaður niðurskurður í ríkisfjármálum þýði að opinberum störfum muni fækka um allt að 8 þúsund. Þetta kom fram í máli Bjarna á Alþingi í morgun.

Bjarni spurði Steingrím J. Sigfússon fjármálaráðherra um boðaðan niðurskurð í ríkisfjármálum í óundirbúnum fyrirspurnum á Alþingi í morgun. Fyrir liggur að ríkið þarf að stoppa upp í 40 til 50 milljarða fjárlagat á næsta ári.

Bjarni spurði ráðherra hvaða niðurskurðarhugmyndir hugmyndir menn væru að ræða og vísaði meðal annars til greinar félagsmálaráðherra í Fréttablaðinu í gær um frystingu launa opinberra starfsmanna.

Þá sagðist hann hafa heyrt tölur þess efnis að ef ná eigi sparnaði upp á 40 til 50 milljarða geti það þýtt fækkun starfa hjá hinu opinbera upp á átta þúsund störf.

Steingrímur sagði hinsvegar að allt tal um að opinberum störfum muni fækka um átta þúsund væri fráleitt og nefndi hann til samanburðar að allt í allt séu um 17 til 18 þúsund manns á launaskrá hjá ríkinu.