Bæjarstjórinn bjartsýnn

Bæjarsjóður Akureyrar kemur fyrst um sinn að rekstri menningarhússins Hofs og er bæjarstjórinn bjartsýnn þrátt fyrir stóran bita í bókhaldi bæjarins. Vígsluathöfn hússins fór fram síðdegis og húsið iðaði af lífi og list.

Fjöldinn allur af fólki kom saman við vígsluathöfn menningarhússins Hofs á Akureyri síðdegis. Húsið verður öllum til sýnis fram á nótt. Fjölmargir listamenn komu fram við vígsluathöfnina eins og Lay Low, Kristján Jóhannsson tenór, Sinfónía Norðurlands og fleiri.

L-listinn sem komst til valda á Akureyri í vor en flokkurinn gagnrýndi verulega byggingu hússins. Ráðinn var ópólitískur bæjarstjóri sem líst vel vel á menningarhúsið.

„Vissulega er þetta búin að vera löng og erfið fæðing. Rökræður um þetta mannvirki voru miklar og sumir segja að þetta hafi verið deilur. En húsið er risið og það er okkar að taka við þessu og reka það," segir Eiríkur Björn Björgvinsson, bæjarstjóri Akureyrar.

Áætlaður rekstrarkostnaður hússins er 60 milljónir á ári og hyggst bæjarsjóður koma að meirihluta rekstursins fyrst um sinn. Eiríkur er bjartsýnn að framhaldið þrátt fyrir að um stóran bita sé að ræða fyrir bókhald bæjarins.