Bílaleigur skila bílum

Bílaleigufyrirtækið Hertz neyddist til að skila hundrað af tæplega fjögur hundruð bifreiðum sem félagið keypti af Toyota umboðinu á Íslandi, vegna samdráttar á bílaleigumarkaði. Pantanir hafa dregist saman um fimmtung miðað við árið í fyrra.

Bílaleigumarkaðurinn á Íslandi var ansi fjörlegur í fyrra en þá voru nánast allir bílar upppantaðir. Margir bjuggust við að sumarið í ár yrði jafn gott ef ekki betra en þá kom eldgosið í Eyjafjallajökli.

Bílaleigan Hertz festi þannig kaup á rúmlega 360 bifreiðum af Toyota umboðinu á Íslandi í vetur til að stækka bílaflotann fyrir sumarið. Sumarið hefur hins vegar ekki staðið undir væntingum og allt 20 prósenta samdráttur varð í bókunum eftir eldgos.

„Við gátum til dæmis skilað bílum til Toyota sem að þeir tóku til baka af okkur. Við leystum það þannig," segir Sigfús Bjarni Sigfússon, framkvæmdastjóri Hertz á Íslandi. Um hundrað bíla var að ræða.

Önnur bílaleigufyrirtæki hafa þurft að grípa til svipaðra aðgerða og skilað bílum.

Menn eru þó bjartsýnir og telja að markaðurinn taki kipp upp á við í lok sumars.

„Haustið lofar góður og við vonum að september og október komi vel út og svo erum við bara mjög bjartsýn fyrir næsta sumar," segir Sigfús.