Talskona Stígamóta: Ánægð með skilning laganna

Guðrún Jónsdóttir, talskona Stígamóta, segist vera ánægð með þann skilning laganna að kaup á vændi sé í raun ofbeldi. En karlmaður var dæmdur í morgun til að greiða 80 þúsund krónur í sekt fyrir að kaupa vændi fyrir 15 þúsund krónur. Hún segir í samtali við fréttastofu að aðalatriðið sé að dæmt sé í þessum málum og lögunum sé fylgt eftir og tekin alvarlega.

„Ég hef ekki gert mikið að því að hætta mér út í umræður um hversu háar eða miklar refsingar eiga að vera. En ég heyri, og sé til dæmis á Facebook, að það er heilmikil óánægja hjá fólki yfir vægum dómum og að það hafi verið lokuð réttarhöld og svo framvegis. Ég ætla sjálf ekki að fara út í það," segir Guðrún.