Fyrsta loðnan veidd í nótt

Fyrsta loðnan á þessari vertíð veiddist í nótt. Skip Samherja, Vilhelm Þorsteinssyni EA, fékk 150 tonn í einu kasti út af Gerpi á Austfjörðum og segir Kristján Vilhelmsson útgerðarstjóri að þetta sé falleg loðna. Hún er öll fryst um borð til manneldis og segir Kristján að þessi byrjun leggist vel í menn. Nú vonist menn eftir að meira finnist af loðnu og að meiri kvóti verði fljótlega gefinn út.

Bræla er á miðunum og vinna skipverjar á Vilhelm Þorsteinssyni um borð í dag við að frysta loðnuna en kasta svo líklega aftur í kvöld. Vilhelm Þorsteinsson EA er eina skipið sem byrjað er á loðnuveiðum en búast má við að þeim fjölgi á næstu dögum eftir að sjávarútvegsráðherra gaf út 130 þúsund tonna kvóta í gær.