Pétur sigraði Tjörva

Pétur Ólafsson, 30 ára gamall þýðandi og sagnfræðingur, hlaut afgerandi kosningu í þriðja sætið í forvali Samfylkingarinnar í Kópavogi sem fer fram í Smáraskóla. Hann fékk 65% atkvæða, en mótframbjóðandi hans Tjörvi Dýrfjörð fékk 33,5%. Auðir seðlar og ógildir voru 1,5%. Áður var kosið á milli átta frambjóðenda um þriðja sætið en þar sem enginn fékk meira en 50% var kosið á milli þeirra sem fengu flest atkvæði.

Hafsteinn Karlsson, bæjarfulltrúi, hlaut fyrr í dag annað sætið í forvalinu. Hann fékk 180 atkvæði, eða 78% atkvæða, en Þorsteinn Ingimarsson hlaut 40 atkvæði, eða 17%. Guðríður Arnardóttir, bæjarfulltrúi, var ein í framboði í fyrsta sætið og hlaut 202 atkvæði eða 87% atkvæða.

Nú stendur yfir kosning um fjórða sæti listans milli þeirra Elvar Logadóttur, Guðrúnar Jónu Jónsdóttur, Hjördísar Erlingsdóttur, Svölu Jónsdóttur og Margrétar Júlíu Rafnsdóttur.