Sophia Hansen dæmd í skilorðsbundið fangelsi

Sophia Hansen var dæmd í 6 mánaða fangelsi skilorðsbundið til þriggja ára fyrir að bera rangar sakir á Sigurð Pétur Harðarson. Dómurinn féll fyrir stundu í Héraðsdómi Reykjavíkur en hún mætti ekki sjálf.

Deilt var um undirskrift á þremur viðskiptabréfum sem Sophia taldi nafn sitt falsað á. Fól hún lögfræðingi sínum að kæra málið til lögreglu árið 2007.

Í vitnaskýrslu hjá lögreglunni lýsti hún því yfir að hana grunaði að Sigurður Pétur hefði falsað nafnið hennar sem á að hafa leitt til þess að hann var ranglega sakaður um skjalafals. Samtals nam upphæð viðskiptabréfanna rétt rúmum 42 milljónum króna.

Hann var hinsvegar hreinsaður sökum þar sem rannsókna sænskra rithandasérfræðinga leiddi í ljós að sennilega skrifaði Sophia sjálf undir viðskiptabréfin.

Málið vakti hinsvegar mikla athygli fyrir þær sakir að dóttir hennar, Rúna Hansen, var vottur á bréfunum og var því kölluð til vitnis. Hún sá sér ekki fært um að mæta í réttarsal heldur bar hún vitni símleiðis. Allur hennar vitnisburður var á tyrknesku.

Sophia var ekki gert að greiða miskabætur vegna málsins, eingöngu laun eigin verjanda.