Barnaverndarmálum fjölgar milli ára

Tilkynningum til barnaverndarnefnda fjölgaði um 16,3 prósent fyrstu níu mánuði síðasta árs, miðað við sama tíma í fyrra.

Fyrstu níu mánuði ársins 2009 bárust 6.906 tilkynningar, en á sama tíma árið áður voru þær 5.940. Fram kemur í frétt Barnaverndarstofu að málin séu mismörg eftir landshlutum. Fjölgun tilkynninga á höfuðborgarsvæðinu nemi rúmlega 22 prósentum, en rúmum fjórum prósentum á landsbyggðinni.

Flestar tilkynningarnar voru vegna áhættuhegðunar barna eða 46,4 prósent. Alls er 35,1 prósent tilkynninga vegna vanrækslu á börnum, 18,1 prósent vegna ofbeldis og 0,4 prósent vegna þess að heilsu eða lífi ófædds barns var stefnt í hættu.“

Fram kemur að í skráningu barnaverndarnefnda hafi í fyrra í fyrsta sinn verið spurt sérstaklega um áfengis- og fíkniefnaneyslu foreldra og um heimilisofbeldi. „Fyrstu níu mánuði ársins 2009 eru 606 tilkynningar þar sem tilkynnt er um vanrækslu og fram kemur að foreldrar eru í áfengis- og/eða fíkniefnaneyslu.“ Slík mál nema tæpum níu prósentum af heildarfjölda tilkynninga.

- óká