Kísilver í Þorlákshöfn komið á fleygiferð

Samningsdrög við erlent fyrirtæki um kísilver í Þorlákshöfn voru lögð fyrir stjórn Orkuveitu Reykjavíkur í dag og er stefnt að undirritun á mánudag.

Ákvæði í samningum Orkuveitunnar og Sveitarfélagsins Ölfuss neyðir menn til að vinna hratt því samkvæmt því rennur forgangur Þorlákshafnar að orkunni út í maílok.

Guðlaugur Sverrisson, stjórnarformaður Orkuveitu Reykjavíkur, segir að ef hann fái leyfi stjórnar á mánudag til að skrifa undir samningsmarkmið verði aðilar að komast að endanlegu samkomulagi á vormánuðum um að fara í þetta verkefni. Álverið í Helguvík fengi þá ekki orku Hverahlíðar. Það gefi augaleið að menn geti ekki selt sömu orkuna tvisvar, segir Guðlaugur.

Gert er ráð fyrir að kísilverið taki til starfa eftir þrjú ár, að því gefnu að fjármögnun takist. Um 400 störf myndu skapast á framkvæmdatíma og síðan 160-170 framtíðarstörf, að sögn Guðlaugs. Á þessu stigi vill Orkuveitan ekki upplýsa um nafn hins erlenda fyrirtækis. Fjárfesting í fyrstu yrði um sextíu milljarðar króna, í virkjun og verksmiðju, nokkru minni en fram kom fram í frétt okkar fyrr í vikunni, en gæti stækkað síðar meir.

Guðlaugur segir að lítil losun yrði á koltvísýringi frá verksmiðjunni, framleiðsluvaran væri eftirsótt í því skyni að nýta sólarorku. Þetta sé mjög jákvætt verkefni á alla kanta.