Yfirdrifnar aðgerðir hjá lögreglunni í Tækniskólanum

Menntamálaráðherra segir aðgerðir lögreglunnar í Tækniskólanum í gær, þar sem leitað var að fíkniefnum með aðstoð hunda, yfirdrifnar og ekki eigi að ala á ótta í forvarnarstarfi. Hún ætlar að taka málið upp við stjórnendur framhaldsskólanna en aðfarir sem þessar hafa viðgengist í framhaldsskólakerfinu.

Lögregla mætti í Tækniskókann í gær án þess að gera boð á undan sér og lokaði öllum útgönguleiðum skólans nema einni, en þar stóðu síðan lögreglumenn með fíkniefnaleitarhund sem þefaði af öllum sem um dyrnar fóru. Menntamálaráðherra segir að sér virðist þetta vera yfirdrifin aðgerð.

Þetta er ein birtingarmynd baráttunnar gegn neyslu ólöglegra vímuefna, en almenn persónuverndarsjónarmið og friðhelgi einkalífsins hljóta einnig að koma til umræðu í málum sem þessum. Katrín Jakobsdóttir menntamálaráðherra segir þetta hafa viðgengist í framhaldsskólum undanfarin ár í samvinnu lögreglu, tollayfirvalda, barnaverndar og skólastjórnenda.