Samningurinn nær óbreyttur

Jón Bjarnason, sjávarútvegs- og landbúnaðarráðherra, og Jacob Vestergaard, starfsbróðir hans í Færeyjum, hafa gengið frá fiskveiðisamningi Íslendinga og Færeyinga fyrir árið 2010. Samningurinn er nær óbreyttur milli ára.

Samkvæmt samningnum fá færeysk skip heimild til að veiða 30 þúsund lestir af loðnu við Ísland á loðnuvertíðinni 2010/2011 svo fremi að útgefinn kvóti verði hið minnsta 500 þúsund lestir. Sé gefinn út minni kvóti fá Færeyingar fimm prósent í sinn hlut. Samkomulag er um að þjóðirnar fái áfram að veiða kolmunna og norsk-íslenska síld innan lögsögu hvor annarrar. Hámarksfjöldi íslenskra skipa í færeysku lögsögunni hverju sinni við kolmunnaveiðar verður áfram tólf.

Botnfiskveiðiheimildir Færeyinga við Ísland verða óbreyttar á árinu 2010. Færeysk skip hafa því heimild til að veiða 5.600 lestir af botnfiski á árinu. Heildarafli þorsks verður þó aldrei meiri en 1.200 lestir og lúðuafli aldrei meiri en fjörutíu lestir. Íslensk skip hafa heimild til að veiða 2.000 lestir af Hjaltlandssíld við Færeyjar og 1.300 lestir af makríl.

Ákveðið var að fulltrúar landanna hittist á næstu misserum til að ræða sérstaklega eftirlit með veiðum í lögsögum Íslands og Færeyja, þar með talið skráningu á afla. - shá