Þolinmæði lögreglumanna á þrotum

„Lögreglumenn hafa gríðarlegt langlundargeð og mikla þolinmæði en sú þolinmæði er nú á þrotum," segir Snorri Magnússon, formaður Landssambands lögreglumanna, í pistli á vef sambandsins. Hann bendir á að kjarasamningar lögreglumanna hafi verið lausir í næstum 290 daga.

Landssamband lögreglumanna fundaði með viðsemjendum sínum í húsnæði Ríkissáttasemjara á þriðjudag í síðustu viku. Þá hópuðust lögreglumenn saman fyrir utan húsið þar sem fundurinn var haldinn til að leggja áherslur á kröfur samninganefndarinnar.

Grunnlaun lögreglumanna eru að meðaltali 20% lægri en meðaltalsgrunnlaun opinberra starfsmanna. Lögreglumenn krefjast því að grunnlaun nýútskrifaðra lögreglumanna hækki úr rúmlega 200 þúsund krónum á mánuði í rúmar 300 þúsund krónur.