Nýstofnuðum fyrirtækjum fækkað um helming frá 2007

Nýstofnuðum fyrirtækjum í landinu hefur fækkað um meira en helming frá góðærisárinu 2007. Samlags- og sameignarfélögum hefur hins vegar fjölgað mikið á árinu vegna breytinga á skattkerfinu.

Aðeins 1532 hlutafélög voru stofnuð í ár, en nánast öll þeirra eru einkahlutafélög. Það er talsverð fækkun frá síðustu tveim árum, en bæði 2008 og 2009 voru stofnuð fleiri en 2500 félög. Munurinn er sláandi ef litið er til góðærisársins 2007, en þá voru fleiri en 3700 fyrirtæki skráð í hlutafélagaskrá. Samdrátturinn nemur því tæplega 60 prósent á þremur árum.

Þetta kemur fram í tölum sem CreditInfo hefur tekið saman fyrir fréttastofu, en þessi mikli munur skýrist ekki síst af því að eignarhaldsfélög og sambærileg fyrirtæki eru stofnuð í mun minna mæli en áður. Í ár var 131 slíkt félag stofnað, en 2007 voru þau meira en fimm sinnum fleiri. Þá eru stofnuð færri félög í kringum byggingarstarfsemi nú en fyrir hrun, en þau voru 116 talsins í ár, samanborið við tæplega 540 félög árið 2007.

Athygli vekur að þrátt fyrir þennan samdrátt í stofnun nýrra hlutafélaga, voru miklu fleiri samlags- og sameignarfélög stofnuð í ár en fyrir hrun. Fjöldi þeirra hefur nærri þrefaldast síðan 2007.

Ástæðan er líklegast sú að eftir breytingar á skattkerfinu á síðasta ári er hluti af arði einkahlutafélaga undir ákveðnum kringumstæðum skattlagður eins og um launagreiðslur sé að ræða. Það gildir hins vegar ekki um samlags- og sameignarfélög, svo mögulegt er að greiða lægri skatta af tekjum með því félagaformi. Þetta virðast frumkvöðlar hafa nýtt sér svo um munar, en ekki var tekið á þessu misræmi fyrir fjárlög næsta árs.