Rannsóknarnefnd um Icesave ótímabær

Þingmannanefnd Atla Gíslasonar telur ótímabært að samþykkja tillögu þess efnis að fram fari rannsókn á innistæðum í útibúum Landsbanka Íslands á Evrópska efnahagssvæðinu og embættisfærslum og ákvörðunum íslenskra stjórnvalda og samskipti við hollensk og bresk stjórnvöld vegna þeirra.

Það voru Sigurður Kári Kristjánsson, þingmaður Sjálfstæðisflokksins, auk fleiri þingmanna úr stjórnarandstöðunni sem lagði tillöguna fram. Segir þingmannanefndin í nefndarálitinu sínu sem birt var í dag að meginþungi tillögunnar liggi í því að rannsökuð verði atvik sem rannsóknarnefnd Alþingis hafi hvorki skoðað né tekið afstöðu til í skýrslu sinni. Hlutverk þingmannanefndarinnar sé að taka afstöðu til skýrslu rannsóknarnefndar Alþingis og draga lærdóma af henni. Umrædd breytingartillaga falli því að mestu leyti utan verksviðs þingmannanefndarinnar og sé því óviðkomandi þingsályktunartillögu nefndarinnar.

„Innan nefndarinnar var ekki andstaða við að slík rannsókn færi fram en meiri hluti nefndarmanna taldi að hún væri ekki tímabær fyrr en samningar við bresk og hollensk stjórnvöld um innlánsreikninga hefðu verið leiddir til lykta. Þá kom fram af hálfu ýmissa nefndarmanna að eðlilegt væri að slík tillaga yrði flutt á komandi löggjafarþingi. Bendir nefndin á að forsætisnefnd Alþingis hafa verið kynnt drög að frumvarpi um opinberar rannsóknarnefndir. Verði slíkt frumvarp að lögum er nauðsynlegur farvegur orðinn til fyrir slíkar rannsóknir," segir í nefndaráliti þingmannanefndarinnar.