Vilja þjóðaratkvæðagreiðslu um stjórn fiskveiða

Ekki ríkti einhugur um skýrsluna sem starfshópur um endurskoðun laga um stjórn fiskveiða gerði og var meðal annars rædd á ríkisstjórnarfundi í dag.

Samtök fiskiframleiðenda og útflytjenda (SFÚ) skora á stjórnvöld að leggja þær leiðir sem helst var rætt um í nefndinni, tilboðsleiðina og samningaleiðina, í þjóðaratkvæðagreiðslu til að ná sátt við þjóðina, eiganda auðlindarinnar.

LÍU vill hinsvegar fara samningaleiðina samkvæmt yfirlýsingu sem finna má á vefsíðu sambandsins.

Í tilkynningu frá SFÚ segir að ef skýrslan er lesin megi sjá að ekki ríkti einhugur um þau atriði sem um var fjallað og ýmis sjónarmið voru uppi. Í bókunum SFÚ við skýrsluna kemur eftirfarandi fram:

„SFÚ lýsti þar yfir fullum stuðningi við tilboðsleiðina sem Þorkell Helgason og Jón Steinsson kynntu.

SFÚ lagði til að enn frekari athuganir yrðu gerðar á þjóðhagslegum áhrifum beggja leiða.

SFÚ ásamt öðrum hagsmunaaðilum lagði til að allur óunninn afli verði seldur á markaði eða markaðsverð á innlendum fiskmörkuðum verði látið ráða í beinum viðskiptum.

Sömu aðilar lögðu til að í lög verði sett ákvæði um fjárhagslegan aðskilnað veiða og vinnslu þar sem óheimilt yrði, út frá samkeppnissjónarmiðum, að fénýta aflaheimildir til niðurgreiðslu á hráefni í eigin vinnslur."

Yfirlýsing Landssambands íslenskra útvegsmanna (LÍU) er hinsvegar eftirfarandi:

„Starfshópur um endurskoðun laga um stjórn fiskveiða hefur nú skilað skýrslu sinni. Í starfshópnum myndaðist breið samstaða um að byggja áfram á aflamarkskerfi og fara svokallaða samningaleið. Sú leið grundvallast á samningum ríkisins og rétthafa aflaheimilda um langtíma afnotarétt og skýrum ákvæðum um framlengingu samninga."