Formaður fjárlaganefndar ánægður með rekstrarafgang Landspítlans

Guðbjartur Hannesson, formaður fjárlaganefndar Alþingis, er ánægður með rekstrarafgang Landspítlans sem var jákvæður um tæpar 36 milljónir króna á fyrri hluta þessa árs. Hann segir afar mikilvægt að stofnanir haldi sig innan fjárheimilda. Þá segir Guðbjartur starfsfólks Landspítlans eiga hrós skilið.

Í byrjun árs var Landspítalanum gert að lækka rekstrarkostnaðinn um rúm 9% eða 3400 milljónir króna. Með umfangsmiklum hagræðingaraðgerðum sem gripið var til á öllum sviðum spítalans um áramót hefur tekist að ná þessu markmiði. Undanfarin ár hefur verið langvarandi halli á rekstri spítalans.

Guðbjartur segir að í kjölfar bankahrunsins hafi verið lögð mikil áhersla á að stofnanir héldu sig innan fjárheimilda og treystu ekki á fjáraukalög líkt og hafi tíðkast á árunum fyrir hrun.

„Það var regla að bæði heilsgæslan og Landspítalinn fengu fjárveitingar eftir á. Þess vegna er það sérstakt fagnaðarefni að þeir hafi náð tökum á rekstrinum," segir Guðbjartur.

Segir starfsfólkið hafa staðið þétt saman

Guðbjartur segir mikilvægt að opinberar stofnanir haldi sig innan fjárheimilda. „Við höfum reynt að fylgjast mjög vel með og veita mönnum aðhald. Þetta krefur okkur auðvitað um að gera góðar áætlanir þannig að hægt sé að veita þá þjónustu sem ætlast er til. Því þurfa vandaðar fjárveitingar og skýlaus krafa um að menn standi fjárlög að fara saman."

Þá segir Guðbjartur mikilvægt að hrósa starfsfólki Landspítlans. „Ég tek undir með Birni Zoëga. Starfsfólkið hefur greinilega lagt sig mjög vel fram og staðið þétt saman um að finna lausnir. Það er til fyrirmyndar."