Slökkviliðsmanna að meta gæði samningsins

Sverrir Björn Björnsson, formaður samninganefndar Landssambands slökkviliðs- og sjúkraflutningamanna, segir að það sé félagsmanna að meta hvort samkomulagið sem landssambandið og Launanefnd sveitarfélaga undirrituðu í dag sé gott. Í samtali við fréttastofu vildi hann ekki greina frá hvað felst í samkomulaginu. „Innihald samningsins er ekki gefið upp að svo komnu máli. Við kynnum það fyrst fyrir okkar félagsmönnum."

Sverrir sagði að ríkissáttasemjari hafi lagt sáttatillöguna fram á fundi með deiluaðilum seinnipartinn í dag. Samkvæmt samkomulaginu hefur verkfallsaðgerðum verið frestað þangað til atkvæðagreiðsla hefur farið fram um það meðal slökkviliðs- og sjúkraflutningamanna.