Hrina mótmæla vegna niðurskurðar á landsbyggðinni

Niðurskurður heilbrigðisþjónustu á landsbyggðinni virðist af fyrstu viðbrögðum vera einhver sársaukamesta aðgerð fjárlagafrumvarpsins. Og ekki stendur á viðbrögðum. Mótmælaályktanir streyma frá viðkomandi svæðum og mótmælaaðgerðir af ýmsu tagi eru í undirbúningi.

Þannig hefur sveitarstjórn Skagafjarðar verið boðuð til aukafundar morgun en þar sjá menn fram á að 30 til 40 starfsmönnum verði sagt upp á Sauðárkróki. Starfsmenn heilbrigðisstofnunarinnar á Blönduósi hafa sent út hvatningu til allra íbúa í Austur-Húnavatnssýslu, sveitarstjórna og stéttarfélaga, að snúa bökum saman, mynda þrýsting og segja stopp. Stjórn Samtaka sveitarfélaga á Norðurlandi vestra segir niðurskurðinn aðför að þessum stofnunum, sem afhjúpi virðingarleysi heilbrigðisyfirvalda til íbúa á þessum svæðum.

Á Húsavík hafa stéttarfélögin, sveitarfélögin og fleiri aðilar í Þingeyjarsýslum auk boðað til borgarafundar síðdegis á fimmtudag og hefur þingmönnum kjördæmisins, heilbrigðisráðherra og fjármálaráðherra verið boðið að mæta. Fundarboðendur segja mikla gremju og reiði meðal Þingeyinga með áformaðan niðurskurð stjórnvalda og fullyrða að hann muni lama heilbrigðisþjónustu á svæðinu og skapa mikið óöryggi í heilbrigðismálum á þjónustusvæði stofnunarinnar. Skorað er á Þingeyinga að flagga í hálfa stöng á fimmtudag.